གྱེས་ཁའི་སྙིང་གཏམ།

འཛིན་གྲོགས་ཚོ།
འགྲུལ་ལམ་རིང་པོའི་ངལ་སྟེགས།
ཐེམ་པའི་ནམ་དུས་ཀྱི་སྐྱེས་ཆུ།
ཆེས་དཀའ་བ་ནི་ཁྱེད་ཅག་ཀྱི་རིན་ཐང་ཚིག་འབྲུར་འགྲེལ་རྒྱུ་དང་།
འདས་ཟིན་པའི་དྲན་ཐོ་དག་སྐྱར་ཀློག་བྱེད་རྒྱུ་དེ་ཡིན་མོད།
དེ་ཡང་། བརྩེ་སེམས་ཀྱིས་ལོ་ཟླ་ཧྲིལ་བུ་དབང་འགྱུར་བྱས་ཏེ།
ངོ་བོ་དང་ལུགས་སྲོལ།
སྐད་གདངས་དང་གཤིས་སྤྱོད།
ཡོངས་རྫོགས་བེད་མེད་ཀྱི་གཡང་གཟར་བརྫངས་ཏེ།
ཁྱིམ་གཞི་བཟང་པོའི་བསོད་ནམས་ཤིག་ཁྱེད་ཀྱིས་བསྐྲུན།
ཕུ་ནུ་ཚོ།
ལས་དབང་གི་ཁ་ཕྱོགས་དང་།
འབབ་ཆུའི་ངར་ཤུགས།
དེ་ལས་ཀྱང་ལྡོག་དཀའ་བ་ནི་དུས་ཀྱི་གོམ་འགྲོས་དང་།
དར་དཀར་གྱིས་བཅིངས་པའི་བརྩེ་སེམས་ཀྱི་མདུད་པ་བཀྲོལ་རྒྱུ་དེ་ཡིན་མོད།
དེ་ཡང་། ལོ་རྒྱུས་ཀྱི་དྲན་རྟེན་རྡོ་རིང་ཞིག་མངོན་འགྱུར་མེད་ནའང་།
བརྗེད་དཀའ་བའི་སྙིང་གཏམ།
བྲལ་དཀའ་བའི་མཛའ་བཤེས།
སྙིང་ཆུང་དམར་རྗེན་གྱིས་འཛིན་པའི་ཕུ་ནུའི་བརྩེ་བ་དག་དང་།
དུས་གསུམ་འགྱུར་མེེད་ཀྱི་བརྩེ་སེམས་དག་སུ་ཡིས་བཅོམ་པར་ནུས།
སློབ་མ་ཚོ།
ལས་དབང་གི་ལམ་སྣེ་དང་།
བརྩོན་པའི་ལམ་ཁྲིད་གཉིས།
དེ་དག་ལས་ཀྱང་གལ་ཆེ་བ་ནི་མི་རབས་ཀྱི་འགན་ཁུར་དང་།
ཆེས་རིན་ཐང་བྲལ་བའི་མེས་པོའི་ཤུལ་འཛིན་བྱ་རྒྱུ་དེ་ཡིན་མོད།
དེ་ཡང་། ལུང་ཚན་རྒྱལ་བས་དེ་དག་བསྒྲུབ་མི་ནུས་ལ།
ངའི་ཕུགས་བསམ་དང་ལྟ་བ།
ཁོ་བོའི་དམིགས་ཡུལ་དང་གཤིས་སྤྱོད།
ཡང་སྙིང་། དེ་ལྟར་འབྱེད་པས་ཁྱེད་ཀྱིས་བདེ་སྐྱིད་ཟབ་མོ་ཞིག་མྱོང་ནུས་ཀྱང་།
དེ་ནི་གོང་མའི་བཀའ་དགོངས་མིན་ལ།
དེས་མི་རབས་ཀྱི་བླ་སྲོག་ཇི་ལྟར་སྐྱོང་ནུས།

སྣག་ཚའི་རྡུལ་ཕྲན་གྱིས། 

མར་མེ།

དངས་གཙང་གི་ཁོར་ཡུག
གཡུ་སྔོན་གྱི་ནམ་འཕང་།
བརྒྱད་ལྡན་གྱི་གངས་ཆུ།
བྱམས་བརྩེའི་འདུ་ཤེས།
དེ་དག་ནི་བསོད་ནམས་མངོན་འགྱུར་གྱི་སྐལ་བཟང་ཤིག་སྟེ།
གདོང་དམར་སྤྱི་ལ་དབང་བའི་ལས་དབང་ཞིག་དང་།
དེ་དག་ནི་རླབས་ཆེན་མེས་པོའི་ཤུལ་བཞག་ཅིག་ཡིན་ལ།
གསོ་དཀའ་བའི་སེམས་ཁམས་ཀྱི་རྨ་ཁ་ཞིག་ཀྱང་ཡིན།
དཔའ་མཛངས་ཀྱི་ངར་སྒྲ།
རིན་བྲལ་གྱི་ཚེ་སྲོག
མཁས་བཙུན་གྱི་ལེགས་བཤད།
འགྲོ་ཀུན་གྱི་སྐྱབས་གནས།
འདི་དག་ནི་དཀའ་སྡུག་སེལ་བའི་སྙིང་སྟོབས་ཁོ་ན་སྟེ།
དཔོག་དཀའ་བའི་འབྱུང་འགྱུར་མི་ཚེའི་རེ་བའང་འདི་དག་ཉིད།
མདོར་ན། མཐའ་ཡངས་ནམ་འཕང་དབང་བའི་གཤོག་སྒྲོ་དང་།
ཕྱི་མའི་མུན་ནགས་སེལ་བའི་མར་མེ་ཞིག།

སྣག་ཚེའི་རྡུལ་ཕྲན་གྱིས། 

དྲན་གསོ་ཞིག

༼སྙིང་ཉེ་བའི་ངའི་སློབ་མ་རྣམས་ལ་དམིགས་ཏེ་བྲིས་པའོ།༽

འགྲན་རྩོད་རྦ་རླབས་འཕྱོ་བའི་སྤྱི་ཚོགས་དབུས།།
རིགས་ཞེན་འདུ་ཤེས་ཉིན་མོའི་སྐར་མ་ཉིད། །
རང་དོན་སྒྲུབ་བྱེད་བཅོས་མའི་རྣམ་འགྱུར་དག།
དགྲ་ལས་འཇིགས་པས་རྟག་ཏུ་ཡིད་གཟབ་གྱིས།།

རྒྱལ་ཞེན་དར་རྩེ་ངག་གིས་འདྲེན་མཁན་མང་།།
རིན་བྲལ་ཕ་སྐད་བསྟོད་པའི་གླུ་གཞས་དང་།།
རྒྱལ་བའི་བཀའ་གསུང་ངག་གི་རྒྱན་བྱས་ཏེ། །
མགོ་གཉིས་མཁས་རྫུན་དག་ལ་ཡིད་གཟབ་གྱིས། །

ངོ་ཚ་སྐྱུར་ཏེ་ཁྲལ་མེད་ལྕགས་འབག་གྱོན། །
རིགས་མཐུན་གོ་ཆར་སྤྱད་དེ་རང་དོན་གཉེར།།
རྒྱུ་འབྲས་བྲལ་བའི་དུག་སྦྲུལ་ལྕེ་གཉིས་དག །
ཕྱོགས་མཚམས་ཡོངས་ལ་མང་བས་རྟག་ཏུ་གཟབ།།

ལང་ཚོའི་མེ་ཏོག་བཞད་པའི་དྲི་ཞིམ་ན།།
བུང་བར་སྤྲུལ་བའི་རྐང་དྲུག་བརྒྱ་ཕྲག་འཁོར།།
ཕུགས་བསམ་ཡོད་ཚུལ་གཏམ་སྙན་གང་བཤད་ཀྱང་།།
རང་ཚུགས་རང་གིས་གཅེས་དགོས་ཤེས་པར་གྱིས།

སློབ་དུས་འགྲུལ་ལམ་རིང་ཞིང་གྱེན་ཐུར་མང་།།
གྲོགས་དང་ལམ་ཁྲིད་མ་བརྟེན་འགྲུལ་དཀའ་ཡང་།།
སྨྲ་མཁས་རླུང་འདེད་རོགས་ཀྱི་གཏམ་སྙན་དང་།།
གཡང་གཟར་ཕྱོགས་པའི་ལམ་ཁྲིད་དག་ལ་གཟབ། །

སྐྱེ་རྒ་ལ་སོགས་འཁོར་བའི་ཆོས་ཉིད་བཞིན།།
གཏན་དུ་འགྲོགས་འདྲིས་མི་སྲིད་མི་ཚེའི་ལམ།།
གཉེན་གྲོགས་མང་ཡང་བསོད་ནམས་མི་མཚུངས་པས།།
འབྲལ་ཁའི་ལས་དབང་སྡུག་ཀྱང་གཡོལ་ཐབས་བྲལ།།

སྣག་ཚའི་རྡུལ་ཕྲན་གྱིས།

སྨྱུག་མིང་འདི་ངས་རེ་བ་ཞུས་བ་བཞིན་ངའི་སློབ་མ་ཞིག་གྱིས་བཏགས་སོ།